ఘోర ప్రమాదం నుంచి బయటపడిన అమితాబ్.. 37 ఏళ్ల నాటి వీడియో వైరల్

37 ఏళ్ల క్రితం ఇదే నెలలో బాలీవుడ్ మెగాస్టార్ ప్రాణలతో బయటపడ్డారు. ఆయన నటించిన ‘కూలీ’ సినిమా చిత్రీకరణ సమయంలో బిగ్ బి‌కి పెను ప్రమాదం జరిగింది. షూటింగ్ సమయంలో ఆయన తన సహ నటుడు పునీత్ హిస్సార్‌తో కలిసి ఫైటింగ్ చేయాల్సి ఉంది. ఆ సమయంలో ఇనుప చువ్వ కడుపులో గుచ్చకుని తీవ్ర గాయమైంది. దాంతో ఆయన్ను వెంటనే ముంబయిలోని బ్రీచ్ క్యాండీ హాస్పిటల్‌కు తరలించారు. రక్తం ఎక్కువ పోవడంతో అమితాబ్ చాలా రోజుల పాటు ఆయన స్పృహలోకి రాలేదు. దాంతో యావత్ భారతదేశం ఆయన త్వరగా కోలుకోవాలని ప్రార్థించింది. వారి ప్రార్థనలు ఫలించి అమితాబ్ స్పృహలోకి వచ్చారు. అలా దాదాపు రెండు నెలల పాటు ఆయన అక్కడే చికిత్స పొందారు. గాయం నుంచి కోలుకున్నాక సెప్టెంబర్ 24న అమితాబ్ హాస్పిటల్ నుంచి డిశ్చార్జ్ అయ్యారు. అయితే ఆ సమయంలో తీసిన వీడియో ఒకటి ప్రస్తుతం సోషల్ మీడియాలో తెగ వైరల్ అవుతోంది. బిగ్ బి కారు నుంచి దిగగానే తన తండ్రి హరివంశ్ రాయ్ బచ్చన్ ఆశీర్వాదం తీసుకున్నారు. తన కుమారుడిని ఆ స్థితిలో చూడగానే హరివంశ్ రాయ్ ఏడ్చేశారు. జీవితంలో ఆయన ఏడవటం అదే మొదటిసారని ఒకానొక సందర్భంలో అమితాబ్ తెలిపారు. ఆ తర్వాత తన తల్లి తేజీ బచ్చన్ వద్దకు వెళ్లి అమితాబ్ ఆశీర్వాదం తీసుకున్నారు. తన కుమారుడి నుదుటిపై తేజీ ముద్దు పెడుతూ వీడియోలో కనిపించారు. అలా అమితాబ్ భారీ ప్రాణాపాయం నుంచి తప్పించుకున్నారు. దెబ్బ నుంచి పూర్తిగా కోలుకున్నాక అమితాబ్ తిరిగి సినిమా షూటింగ్స్‌లో పాల్గొన్నారు. 1982లో అమితాబ్ నటించిన ‘కూలీ’ సినిమా విడుదలై బాక్సాఫీస్ వద్ద బ్లాక్ బస్టర్ విజయాన్ని దక్కించుకుంది. మరో విషయం ఏంటంటే.. ఇటీవల అమితాబ్‌కు కేంద్ర ప్రభుత్వం ప్రతిష్ఠాత్మక దాదా సాహెబ్ ఫాల్కే అవార్డును ప్రకటించింది. ఆయనకు అవార్డును సెప్టెంబర్ 24న ప్రకటించారు. 37 ఏళ్ల క్రితం సరిగ్గా అదే రోజున అమితాబ్ హాస్పిటల్ నుంచి డిశ్చార్జ్ అయ్యి ఇంటికి వచ్చారు. దాంతో సెప్టెంబర్ 24ని అమితాబ్ రెండో పుట్టినరోజుగా అభిమానులు చెప్తుంటారు. అందుకే ఏటా సెప్టెంబర్ 24న అమితాబ్ తనకు జరిగిన ఘోర ప్రమాదం గురించి గుర్తుచేసుకుంటూ ఉంటారు. అభిమానుల ప్రేమాభిమానాల వల్లే తాను ప్రాణాలతో బయటపడ్డానని అంటుంటారు.

from Telugu Movie News | Movie News in Telugu | Movie Gossips in Telugu https://ift.tt/2nzXt50