‘హ హ హాసిని’.. అంటూ యువత మనసు దోచుకున్నారు నటి జెనీలియా. ‘బాయ్స్’ సినిమాతో తెలుగు ఇండస్ట్రీలోకి ఎంట్రీ ఇచ్చి ‘సై’, ‘హ్యాపీ’, ‘బొమ్మరిల్లు’, ‘ఢీ’, ‘రెడీ’ వంటి ఎన్నో విజయవంతమైన సినిమాల్లో నటించారు. ముఖ్యంగా ‘బొమ్మరిల్లు’ సినిమా కెరీర్‌లో ల్యాండ్ మార్క్‌గా నిలిచిపోయింది. హాసిని అన్న పేరు వినగానే బొమ్మరిల్లు సినిమాలో జెనీలియా పాత్ర గుర్తుకొచ్చి నవ్వుకునే ప్రేక్షకులు ఎందరో. సినిమా అవకాశాలు పెద్దగా రావడంలేని సమయంలో జెనీలియా.. బాలీవుడ్ నటుడు రితేశ్ దేశ్‌ముఖ్‌ను 2012లో వివాహం చేసుకున్నారు. వీరిది ప్రేమ వివాహం. రితేశ్.. మహారాష్ట్ర మాజీ ముఖ్యమంత్రి విలాస్ రావ్ దేశ్‌ముఖ్ కుమారుడు. రితేశ్, జెనీలియా దంపతులకు ఇద్దరు కుమారులు ఉన్నారు. వీరిద్దరూ తమ సినీ కెరీర్‌ను ‘తుఝే మేరీ కసమ్’ సినిమాతో ఒకేసారి మొదలుపెట్టారు. తెలుగులో బ్లాక్ బస్టర్ విజయం అందుకున్న ‘నువ్వేకావాలి’ సినిమాకు ఇది రీమేక్. అప్పుడే వీరిద్దరి మధ్య స్నేహం ఏర్పడి అది ప్రేమగా మారింది. ఆ తర్వాత ‘బాయ్స్’ సినిమాతో జెనీలియా తెలుగు వైపు వచ్చేశారు. ఇక్కడ వరుస సినిమాలు చేస్తూ మధ్యలో కన్నడ, తమిళం, హిందీ సినిమాల్లో కూడా నటించేవారు. పెళ్లయ్యాక జెనీలియా సినిమాలకు పూర్తిగా దూరమయ్యారు. పెళ్లయ్యాక ఆమె నటించిన సినిమా ‘జై హో’. తెలుగులో మంచి విజయం అందుకున్న ‘స్టాలిన్’కు ఇది రీమేక్‌గా వచ్చింది. అయితే ఇందులో జెనీలియా చిన్న పాత్రలో నటించారు. 2016లో వచ్చిన ‘ఫోర్స్ 2’లోనూ ఆమె కేమియో పాత్రను పోషించారు. ఇప్పటివరకు పూర్తిస్థాయి కథానాయికగా జెనీలియా నటించలేదు. ఇక ఎటూ తన ఇద్దరు కుమారులు స్కూల్‌కి వెళుతుండడంతో జెనీలియాకు కాస్త సమయం దొరికింది. దాంతో తన సెకెండ్ ఇన్నింగ్స్‌ను ప్రారంభించాలని అనుకుంటున్నారు. ఈ విషయాన్ని ఓ ఇంటర్వ్యూలో వెల్లడించారు. ‘నా జీవితంలో ఎన్నో అనుభవాలను రుచిచూశాను. ఒకప్పుడు సినిమాలే జీవితంగా బతికాను. ఆ తర్వాత మంచి భార్యను, తల్లిని అయ్యాను ఇప్పుడు నా కెరీర్‌ను మళ్లీ ప్రారంభించాలని అనుకుంటున్నాను. స్క్రిప్ట్స్‌ కూడా వింటున్నాను. నా జీవితంలో జరిగిన గొప్ప విషయం ఏదన్నా ఉందంటే అది తల్లి కావడమే. నా కుమారులు రియాన్, రహిల్ నా జీవితాన్ని పర్‌ఫెక్ట్‌గా మార్చారు. వయసు అనేది కేవలం ఓ నెంబర్ మాత్రమే. వయసవడం కూడా ఒకందుకు మంచిదే’ అని వెల్లడించారు జెనీలియా. మరి ఈ హాసిని తెలుగు ప్రేక్షకులనూ మరోసారి పలకరిస్తుందో లేదో చూడాలి.
from Telugu Movie News | Movie News in Telugu | Movie Gossips in Telugu https://ift.tt/2LvPkIo
No comments:
Post a Comment