‘తలైవి’ రివ్యూ: ఇన్‌స్పిరేషనల్ జర్నీ

చిత్రం: త‌లైవి సెన్సార్‌: యు వ్య‌వ‌థి: 2 గం 33 నిమిషాలు బ్యాన‌ర్స్‌: జీ స్టూడియోస్‌, విబ్రీ మోష‌న్ పిక్చ‌ర్స్‌, క‌ర్మ మీడియా అండ్ ఎంట‌ర్‌టైన్మెంట్‌, గోథిక్ ఎంట‌ర్‌టైన్‌మెంట్‌, స్ప్రింట్ ఫిల్మ్స్‌ న‌టీన‌టులు: కంగ‌నా ర‌నౌత్‌, అర‌వింద‌స్వామి, స‌ముద్ర‌ఖ‌ని, నాజ‌ర్‌, భాగ్య‌శ్రీ, మ‌ధుబాల‌, తంబి రామ‌య్య‌, పూర్ణ త‌దిత‌రులు సంగీతం: జి.వి.ప్ర‌కాశ్ కుమార్‌ సినిమాటోగ్ర‌ఫీ: విశాల్ విఠ‌ల్‌ ఎడిటింగ్‌: ఆంథోని, బాలు స‌లూజ‌ స్క్రిప్ట్: విజయేంద్ర ప్రసాద్ నిర్మాతలు: విష్ణు వర్ధన్ ఇందూరి, శైలేష్ ఆర్.సింగ్, బృంద ప్రసాద్ దర్శకత్వం: ఎ.ఎల్.విజయ్ ఇండియ‌న్ సినిమాల్లో ఈ మ‌ధ్య బ‌యోపిక్స్ హ‌వా కొన‌సాగుతూనే ఉంది. ప‌లు రంగాల్లో విశేష కృషి, గుర్తింపు సంపాదించి ప్రేక్ష‌కుల గుండెల్లో చిర‌స్థాయిగా నిలిచిన వ్య‌క్తులు, దేశానికి వ‌న్నె తెచ్చిన వారు.. ఇలా ఎంద‌రివో జీవిత చరిత్ర‌లు సిల్వ‌ర్ స్క్రీన్‌పై సంద‌డి చేశాయి. ఈ క్ర‌మంలో రూపొందిన మ‌రో బ‌యోపిక్ ‘త‌లైవి’. తమిళనాడు దివంగత ముఖ్యమంత్రి జయలలిత జీవితంలో కొన్ని ఘటనలను ఆధారంగా చేసుకుని, సినీ నటిగా మొద‌లైన ఆమె ప్ర‌యాణం ముఖ్య‌మంత్రి అయ్యే వర‌కు ఎలా కొన‌సాగింది. ఈ క్ర‌మంలో ఆమె ఎలాంటి ఒడిదొడుకుల‌ను ఎదుర్కొంది. ఎదురైన స‌వాళ్ల‌ను ఎలా ప్ర‌తిఘ‌టించి విజ‌యం సాధించింది అనే అంశాల‌తో ఎ.ఎల్‌.విజ‌య్ ద‌ర్శ‌క‌త్వంలో రూపొందిన ‘త‌లైవి’ ఎలా ఉంది? త‌మిళ ప్ర‌జ‌ల మ‌న్న‌న‌లు అందుకుంటుందా? సినిమా ఎమోష‌న‌ల్‌గా ప్రేక్ష‌కుల‌కు క‌నెక్ట్ అవుతుందా? అనే విష‌యాలు తెలియాలంటే ముందు క‌థేంటో చూద్దాం. క‌థ‌: 1989 త‌మిళ‌నాడు అసెంబ్లీలో ప్ర‌తిప‌క్ష నాయ‌కురాలైన జ‌య‌ల‌లిత(కంగ‌నా ర‌నౌత్‌).. అధికార ప‌క్షంలోని ముఖ్య‌మంత్రి క‌రుణ‌(నాజ‌ర్‌)ను నిల‌దీస్తుంది. త‌న పార్టీ ఎమ్మెల్యేల‌ను పోలీసులు దౌర్జ‌న్యంగా, అకార‌ణంగా అరెస్టులు చేస్తున్నారంటూ ప్ర‌శ్నిస్తుంది. మాటామాట పెరిగి, అధికార పార్టీకి చెందిన ఓ ఎమ్మేల్యే జ‌య‌పై చేయి చేసుకోవ‌డ‌మే కాకుండా, ఆమె చీర లాగే ప్ర‌య‌త్నం చేసి అవ‌మానిస్తాడు. అసెంబ్లీ నుంచి త‌న పార్టీ ఎమ్మెల్యేల‌తో బ‌య‌ట‌కు వ‌చ్చిన జ‌య‌, మ‌హాభారంతో ద్రౌప‌తికి త‌న‌కు ఎదురైన అవ‌మాన‌మే ఎదురైన‌ప్పుడు, ఆమె శ‌ప‌థం చేసి ఆ నూరుగురు కౌర‌వుల‌ను హ‌తమ‌య్యే వ‌ర‌కు త‌ల ముడి వేసుకోలేదని, అలాగే తాను కూడా ముఖ్య‌మంత్రి అయ్యే వ‌ర‌కు అసెంబ్లీలో అడుగు పెట్ట‌న‌ని శ‌ప‌థం చేస్తుంది. అక్క‌డ సీన్ క‌ట్ చేస్తే సినిమా 1965లోకి వెళుతుంది. జ‌య‌ల‌లిత హీరోయిన్‌గా కెరీర్ స్టార్ట్ చేసిన సంవ‌త్స‌ర‌మ‌ది. ఆమె ప‌ద‌హారేళ్ల వ‌య‌సులోనే హీరోయిన్‌గా అగ్ర క‌థానాయ‌కుడు ఎం.జి.రామ‌చంద్ర‌న్‌తో న‌టిస్తుంది. హీరో హీరోయిన్లుగా మొద‌లైన వారి ప్ర‌యాణం రాజ‌కీయాల వైపుకు ఎలా మ‌ళ్లింది. రామ‌చంద్ర‌న్ మ‌ర‌ణం త‌ర్వాత జ‌య‌ల‌లిత పార్టీ ప‌గ్గాల‌ను ఎలా చేప‌ట్టింది. ఈ క్ర‌మంలో ఆమె ఎదుర్కొన్న స‌వాళ్లేంటి? ఎలా విజ‌యం సాధించింది. ఈ ప్ర‌యాణంలో ఆమెకు తోడుగా నిల‌బ‌డ్డ వారెవ‌రు? అనే విష‌యాలు తెలియాలంటే సినిమా చూడాల్సిందే. విశ్లేషణ: సాధార‌ణంగా బ‌యోపిక్స్ తీయ‌డంలో మేక‌ర్స్‌కు ఇబ్బందులు ఉంటాయ‌న‌డంలో సందేహం లేదు. చాలా జాగ్ర‌త్త‌లు తీసుకోవాలి. అయితే రాజ‌కీయ నాయ‌కులు జీవిత చ‌రిత్ర‌ల‌ను సినిమాలుగా మ‌లిచేట‌ప్పుడు మ‌రి ఎక్కువ జాగ్ర‌త్త‌లు తీసుకోవాలి. ఎవ‌రి మ‌నోభావాలు దెబ్బ తిన‌కుండా చూసుకోవాలి. న‌టీన‌టుల‌ను, సాంకేతిక నిపుణులను చ‌క్క‌గా సెల‌క్ట్ చేసుకోవ‌డ‌మే కాదు, అందుకు త‌గిన‌ట్లు ఔట్‌పుట్ రాబ‌ట్టుకోవాలి. స్క్రీన్‌ప్లేను ఎమోష‌న‌ల్‌గా క‌నెక్ట్ అయ్యేలా చూసుకోవాలి. ఏమాత్రం తేడా కొట్టినా , సినిమా చూసే ప్రేక్ష‌కుడికి బోర్ కొట్టేస్తుంది. మ‌రి ‘త‌లైవి’ విష‌యంలో ద‌ర్శ‌కుడు ఎ.ఎల్‌.విజ‌య్ సినిమాను తెరకెక్కించిన తీరు చూస్తే.. సినిమా ప్రారంభం అద్భుతంగా ఉంది. జ‌య‌ల‌లిత అసెంబ్లీలో అవ‌మాన‌ప‌డే స‌న్నివేశం నేటిత‌రంలో చాలా మందికి క‌నెక్ట్ అవుతుంది. అక్క‌డ నుంచి సినిమా వెళ్లే క‌మ్రంలో జ‌య‌ల‌లిత హీరోయిన్‌గా మారే క్ర‌మంలో ఎం.జి.రామ‌చంద్ర‌న్‌తో చిన్న‌త‌నంగా ప్ర‌వ‌ర్తించ‌టం, త‌ర్వాత ఆయ‌న మంచి మ‌న‌సు తెలుసుకుని త‌న‌కు అభిమానిగా మారుతుంది. త‌ర్వాత రామ‌చంద్ర‌న్‌, జ‌య‌ల‌లిత జంట హిట్ పెయిర్‌గా మారుతుంది. రామ‌చంద్ర‌న్ అంటే జ‌య‌ల‌లిత అభిమానించ‌టం, అది న‌చ్చ‌ని నిర్మాత ఆర్‌.ఎం.వి జ‌య‌ల‌లిత‌ను దూరం పెట్టాల‌ని చూడ‌టం వంటి విష‌యాలతో సినిమా సాగుతుంది. ఇవ‌న్న ప్రేక్ష‌కుడికి పెద్ద‌గా కనెక్ట్ కావు. సెకండాఫ్‌లో జ‌య‌ల‌లితను రాజ‌కీయాల్లోకి రావాలంటూ రామ‌చంద్ర‌న్ ఆహ్వానించ‌టం.. ఆమె, పాలిటిక్స్‌లోకి ఎంట్రీ ఇవ్వ‌డానికి ఎదురైన ఎమోష‌న‌ల్ సీన్స్.. జ‌య‌.. అమ్మ‌గా ఎలా మారింది. రామ‌చంద్ర‌న్ చ‌నిపోయిన త‌ర్వాత ఎలాంటి అవ‌మానాలు ఎదుర్కొంది. వాటిని ఎలా ఎదుర్కొంది. అసెంబ్లీలో అవమానాలు ఎదురైన త‌ర్వాత‌, రాజ‌కీయాల్లో ఆమె వేసిన అడుగులు సంద‌ర్భాల్లో కొన్ని ఎమోష‌న‌ల్‌గా ప్రేక్ష‌కుల‌కు క‌నెక్ట్ అవుతాయి. ‘సేనాధిప‌తి ఉండేట‌ప్పుడు చ‌క్ర‌వ‌ర్తి యుద్ధానికి వెళ్ల‌కూడ‌దు..’ ‘సేనాధిప‌తి లేకుండా చ‌క్ర‌వ‌ర్తి ఏం చేయలేడు’ ‘నన్ను అమ్మ‌గా ఆద‌రిస్తే హృద‌యంలో చోటు ఉంటుంది. మ‌హిళ‌గా చూస్తే ...’ ‘ప్రజలను నువ్వు ప్రేమిస్తే..ప్రజలు నిన్ను ప్రేమిస్తారు’ వంటి డైలాగ్స్ సందర్భానుచితంగా ప్రేక్ష‌కుల‌ను ఆక‌ట్టుకుంటాయి. మ్యూజిక్ డైరెక్ట‌ర్ నేప‌థ్య సంగీతం సినిమాకు పెద్ద ఎసెట్‌గా నిలిచింది. విశాల్ విఠ‌ల్ సినిమాటోగ్ర‌ఫీ బావుంది. ప్రొడ‌క్ష‌న్ వేల్యూస్ బావున్నాయి. ఆర్ట్ డిపార్ట్‌మెంట్ వ‌ర్క్‌ను అభినందించి తీరాల్సిందే. జ‌య‌ల‌లిత పాత్ర‌లో కంగ‌నా ర‌నౌత్ ఒదిగిపోయింది. జ‌య‌ల‌లిత వ‌య‌సును బ‌ట్టి ఆమె లుక్ ఎలా ఉంద‌నే విష‌యంలో కంగనా బ‌రువు పెరిగి, త‌న లుక్‌ను మార్చుకుని పాత్ర‌కు ప్రాణం పోసింది. ఇక రామ‌చంద్ర‌న్ పాత్ర‌లో అర‌వింద‌స్వామి కూడా చ‌క్క‌గా సూట్ అయ్యాడు. క‌రుణ‌నిధి పాత్ర‌లో నాజ‌ర్‌, ఆర్‌.ఎం.వీర‌ప్ప‌న్ పాత్ర‌లో స‌ముద్ర‌ఖ‌ని .. ఇలా అంద‌రూ వారి పాత్ర‌ల‌కు చ‌క్క‌గా న్యాయం చేశారు. సినిమా ప్ర‌థ‌మార్థం వీక్‌గా ఉంది. సెకండాఫ్ మాత్రం మెప్పిస్తుంది. ముఖ్యంగా దర్శకుడు ఎ.ఎల్.విజయ్.. జయలలిత అభిమానులను, పార్టీ శ్రేణులను, కరుణానిధి అభిమానులను, పార్టీ శ్రేణులను, ఎం.జె.రామచంద్రన్ అభిమానులను నొప్పించకుండా.. ఎవరికీ నెగటిల్ ఆలోచనలు రాకుండా సినిమాను తెరకెక్కించారు. చివ‌ర‌గా.. ‘త‌లైవి’.. మ‌హిళా శ‌క్తికి ప‌ర్‌ఫెక్ట్ ఎగ్జాంపుల్‌

from Telugu Movie News | Movie News in Telugu | Movie Gossips in Telugu https://ift.tt/3nhOMZT