‘వర్మా.. ఏందయ్యా మాకీ కర్మా’ అనేట్టుగానే ఉంటాయి చేసే ట్వీట్లు. చెప్పేది తిన్నగా చెప్పడు.. పోనీ చెప్పకుండా ఉండను.. పోనీ చెప్పిందాంట్లో ఏదైనా అర్థం తీసుకుందామా? అంటే నేనన్న దాంట్లో ఆ అర్థం లేదే అని తప్పించుకుంటాడు. మరీ వాదిస్తే లాజిక్లు లాగుతాడు.. కుదరకపోతే ఎటాక్ అనేస్తాడు. నునుపైన నేలపై బొక్కబోర్లా పడ్డ నీళ్లు టైపు ఈ వర్మ.. ఎటు వీలుంటే అటు దారి తీసేస్తాడు. ఉన్న చోట ఉండడు.. ఉన్నాడంటే ఏదో కిరికిరే. ఇదిగో మళ్లీ అలాంటి కిరికిరే పెట్టాడు. అందరూ పెంచుకున్నట్టుగానే వర్మ కూడా తన ఇంట్లో కుక్కను పెంచుకుంటున్నాడట. ఈ విషయాన్ని సోషల్ మీడియా ద్వారా తెలియజేస్తూ కుక్కతో పాటు దిగిన ఫొటోని షేర్ చేశాడు. ఇందులో ఆశ్చర్యం ఏం ఉంది.. కుక్కల్ని అందరూ పెంచుకుంటారు.. వర్మ కూడా పెంచుకుంటున్నాడు.. అబ్బా!! వర్మ కొత్త నల్ల కుక్క భలే ఉందే. తేడాలొస్తే తొడలో కేజీకి తగ్గకుండా లాగేసేటట్టే ఉంది ఆ బ్లాక్ డాగ్. అసలు మనుషుల్నే ప్రేమించని ఈ వర్మకు ఈ కుక్కలపై ఎందుకంత ప్రేమ పుట్టుకొచ్చింది అంటే.. అందులోనూ మనోడి స్వార్థం ఉంది. దాన్ని మొహమాటం లేకుండా చెప్పేశాడు. కొందరు అభిమానుల నుండి తనకు రక్షణగా రెండు కుక్కలను తెచ్చుకున్నా.. అంటూ ఎవరయ్యా ఆ అభిమానులు అంటే పీకేఎఫ్, సీబీఎన్ఎఫ్, ఎల్ బీ ఎఫ్.. అని పేర్లు ఇచ్చాడు. ఇందులో ఎఫ్ అంటే ఏంటో మీరే చెప్పండని ఫజిల్ ఇచ్చాడు వర్మ. సరే ఈ ట్వీట్లో మనకు అర్థమైనంతవరకూ పీకేఎఫ్ అంటే.. పవన్ కళ్యాణ్ ఫ్యాన్స్ అని, సీబీఎఫ్ అంటే చంద్రబాబు ఫ్యాన్స్ అని, ఎల్ బీ ఎఫ్ అంటే లోకేష్ బాబు ఫ్యాన్స్ అని అనుకుందాం. మరి ఈ ముగ్గురు ఫ్యాన్స్ నుండి వర్మను ఆ కుక్కలు ఎంతవరకూ రక్షణగా నిలుస్తాయో చూడాలి. జరభద్రం వర్మో!!
from Telugu Movie News | Movie News in Telugu | Movie Gossips in Telugu https://ift.tt/2IOjLr8
No comments:
Post a Comment