‘వార్’ ట్విటర్ రివ్యూ: బ్లాక్ బస్టర్ అంటున్న నెటిజన్లు

బాలీవుడ్ గ్రీక్‌గాడ్‌గా పేరు తెచ్చుకున్న హృతిక్ రోషన్ సినిమా వస్తోందంటేనే అభిమానుల్లో ఓ రకమైన ఆసక్తి ఉంటుంది. ‘సూపర్ 30’ సినిమాతో మంచి విజయం అందుకున్న హృతిక్ రోషన్ ఇప్పుడు ‘వార్’ అంటూ ప్రేక్షకుల ముందుకు వచ్చారు. ఇందులో మరో స్టార్ కిడ్ కూడా ఉన్నారు. ఆయనే టైగర్ ష్రాఫ్. హృతిక్ రోషన్, టైగర్ ష్రాఫ్‌లకు యాక్షన్ హీరోలుగా మంచి గుర్తింపు ఉంది. అదీకాకుండా టైగర్‌కు హృతిక్ రోషన్ అంటే చాలా ఇష్టం. ఆయన్ని రోల్ మోడల్‌గా భావిస్తాడు. అలాంటిది ఆయనతో సమానమైన పాత్రలో నటించే అవకాశం దక్కించుకున్నాడు. ఇక ఊరుకుంటాడా.. తన పర్‌ఫార్మెన్స్‌తో చెలరేగిపోడూ. సిద్ధార్థ్ ఆనంద్ తెరకెక్కించిన ఈ సినిమా భారీ అంచనాల మధ్య ఈరోజు ప్రేక్షకుల ముందుకు వచ్చింది. పైగా మెగాస్టార్ చిరంజీవి నటించిన ‘సైరా నరసింహారెడ్డి’ సినిమాతో పోటీ పడుతూ తెలుగులోనూ విడుదలైంది. అఫ్‌కోర్స్.. తెలుగులో చిరంజీవిని బాక్సాఫీస్ వద్ద మరే బాలీవుడ్ హీరో బీట్ చేయలేరనుకోండి. చిరు నటించిన ప్రతిష్ఠాత్మక చిత్రం ఈరోజు విడుదల అవుతోందని తెలిసి ఆయనకు పోటీగా తెలుగులోనూ ఈ సినిమాను ఎందుకు విడుదల చేయాలనుకున్నారో చిత్రబృందానికే తెలియాలి. సినిమా తొలి రోజే హిందీ వెర్షన్ దాదాపు రూ.45 కోట్లు దాటుతుందని సినీ విశ్లేషకులు అంచనా వేస్తున్నారు. ఎందుకంటే సినిమాలో ఇద్దరు యాక్షన్ హీరోలు ఉన్నారు. ఎంతకాదన్నా అంచనాలు ఈ రేంజ్‌లో ఉండటంలో తప్పు లేదు. సినిమాకు వస్తున్న టాక్‌ను బట్టి చూస్తే ఆ వసూళ్ల అంచనాలు నిజమయ్యేలా ఉన్నాయ్. సినిమాకు నెటిజన్లు పాజిటివ్ రివ్యూలే ఇస్తున్నారు. హృతిక్ రోషన్, టైగర్ ష్రాఫ్ ఎంట్రీ సీన్స్ హైలైట్‌గా నిలిచాయని అంటున్నారు. ఓ సస్పెన్స్‌తోనే సినిమా మొదలవుతుందని నెటిజన్లు చెబుతున్నారు. ముందుగా ఊహించినట్లుగానే సినిమా మొత్తంలో హృతిక్, టైగర్ ష్రాఫ్ కెమిస్ట్రీనే హైలైట్‌గా నిలిచిందట. 2019లో హిందీకి ఒక రూ.300 కోట్ల క్లబ్‌లో చేరే సినిమా ఇదేనని అంటున్నారు. ‘క్రిష్ 3’ తర్వాత అంతటి స్థాయిలో హృతిక్‌కి ఏ సినిమా కిక్ ఇవ్వలేకపోయింది. ఆ తర్వాత వచ్చిన అన్ని సినిమాలు బాక్సాఫీస్ వద్ద నిరాశపరిచినవే. ఈ ఏడాదిలో విడుదలైన ‘సూపర్ 30’ సినిమా ఫర్వాలేదనిపించింది. మరోపక్క టైగర్ ష్రాఫ్‌కి ‘స్టూడెంట్ ఆఫ్ ది ఇయర్ 2’ సినిమా షాక్ ఇచ్చింది. దాంతో ఇలాంటి ప్రయత్నాలు అస్సలు చేయకూడదని గట్టిగా నిర్ణయించుకున్నాడు. ఏదైతేనేం ట్విటర్ రివ్యూలను బట్టి చూస్తే చాలా కాలం తర్వాత హృతిక్, టైగర్‌కి ఓ బ్లాక్ బస్టర్ సినిమా ట్రాక్‌లో పడినట్లే అనిపిస్తోంది.

from Telugu Movie News | Movie News in Telugu | Movie Gossips in Telugu https://ift.tt/2opbMd0