‘థ్యాంక్ యు బ్రదర్’ రివ్యూ

ఏదైనా ఓ పాత్రను ఒప్పుకున్నారు.. ఓ సినిమా చేస్తున్నారంటే అందరిలోనూ అంచనాలుంటాయి. మరీ ముఖ్యంగా డీ గ్లామర్, ఛాలెంజింగ్ రోల్స్ చేసేందుకు అనసూయ ముందుకు వస్తుండటంతో ప్రేక్షకులు ఎక్కువ ఆసక్తిగా ఎదురుచూస్తుంటారు. అలా అనే సినిమాలొ గర్భవతిగా నటించారు. ఆహాలో ఈ మూవీ నేటి నుంచి అందుబాటులోకి వచ్చింది. ఈ మూవీ ఎలా ఉంది.. కథ ఏంటి.. అనసూయ ఎలా నటించారు? అనే విషయాలను ఓ సారి చూద్దాం. కథ భర్త చనిపోయి ఎలాంటి ఆర్థిక అండలేకుండా జీవితాన్ని గడిపే ప్రియ (అనసూయ), చిన్నతనంలోనే తండ్రి చనిపోయి ఆ ప్రేమకు దూరమైన అభి (విరాజ్ అశ్విన్)‌ల కథే థ్యాంక్ యు బ్రదర్. ప్రియ భర్త సూర్య (ఆదర్శ్) ఫ్యాక్టరీలో జరిగిన ప్రమాదంలో మరణిస్తారు. ఆయన మరణంతో ప్రియ జీవితం తలకిందులవుతుంది. అత్తగారే లోకంగా, పుట్టబోయే బిడ్డ కోసం ప్రియ కలలు కంటుంటారు. తన అమ్మ భాను (అర్చన అనంత్), పెంచిన తండ్రి ప్రేమ్ (అనీష్ కురువిల్లా) మీద అభి అసహ్యంతో ఉంటారు. డబ్బు, అమ్మాయిలు, తాగడం వంటి వ్యసనాలతో ఆవారాలా తిరుగుతుంటారు. అలాంటి అభి.. కష్టాల్లో ఉన్న ప్రియకు ఎలా సాయం చేశాడు?.. అసలు ఈ ఇద్దరూ కలవాల్సిన పరిస్థితి ఎందుకు వచ్చింది? లిఫ్ట్‌లో ఇరుక్కున ప్రియ, అభిలు ఎలా బయటపడ్డారు? అభి చేసిన గొప్ప సాహసం ఏంటి? అనేవి కథలోని కీలక అంశాలు. కథనం థ్యాంక్ యు బ్రదర్ లాంటి సినిమాలు ఓటీటీ ప్రపంచానికి సరిగ్గా సరిపోతాయి. ఈ సినిమా నిడివి 96 నిమిషాలే. దర్శకుడు తాను చెప్పదలుచుకున్నది ఏంటో క్లియర్ కట్‌గా సూటిగా సుత్తి లేకుండా చెప్పేశారు. ఎక్కడా కూడా డీవియేట్ అవ్వలేదు. అయితే ఇదంతా కూడా గతేడాది కరోనా, లాక్డౌన్ సమయంలో తెరకెక్కించారు. అప్పటి లాక్డౌన్ నియమాలు, కరోనా నిబంధనలను అనుసరించి మాస్కలు వాడటం, సామాజిక దూరం పాటించడం వంటివి చూపించారు దర్శకుడు. అయితే ఈ కథలో మొదటి భాగం ఏమంత ఆసక్తికరంగా సాగదు. ఆ తదుపరి వచ్చే సీన్ ఏంటన్నది ఇట్టే తెలిసిపోతోంది. ప్రియ తన భర్తను తలుచుకుని బాధపడటం, తన భర్త చనిపోయిన తరువాత కంపెనీ ఇచ్చే ఆర్థిక సాయం కోసం ప్రియ ప్రయత్నిస్తుంటారు. దాని కోసం ఓ అపార్ట్మెంట్‌కు వస్తారు. అలాగే మరో వైపు అభి సైతం తన తిరుగుళ్లు, చెడు అలవాట్లను మందలించిన అమ్మ మీద కోపంతో సొంతంగా ఎదిగేందుకు ప్రయత్నాలు మొదలుపెడతాడు. అభికి ఉన్న గర్వం, పొగరు, యాటిట్యూడ్ కారణంగా ఎక్కడా కూడా ఉద్యోగం పుట్టదు. రెండో పెళ్లి చేసుకున్నావ్ అంటూ అమ్మను దారుణంగా తిట్టేస్తాడు అభి. నిన్ను కన్నప్పుడు పడిన పురిటినొప్పుల బాధను ఇప్పటికీ నీ వల్ల అనుభవిస్తున్నానురా అని అభి మీద తన అమ్మ భాను చేయి చేసుకుంటుంది. ఇలా ఇంట్లో జరిగిన గొడవ, అభి పద్దతి, ప్రవర్తన చూసి తన ప్రియురాలు కూడా అభిని దూరం పెడుతుంటుంది. అమ్మను ప్రేమించలేని వ్యక్తి ఏ అమ్మాయిని ప్రేమించలేడని చెప్పి దూరమవుతుంది. కానీ అభిలో మాత్రం ఇసుమంత కూడా చలనం ఉండదు. మహిళలు అన్నా, అమ్మ అన్నా కూడా తనకు ఏ మాత్రం గౌరవం ఉండదన్నట్టుగా వ్యవహరిస్తాడు. అలా ఇంటి నుంచి బయటకు వచ్చిన అభి తన ఉద్యోగ ప్రయత్నాలు మొదలుపెడతాడు. ఈ క్రమంలో ఎక్కడా ఉద్యోగం లభించదు. డబ్బులు ఉన్నప్పుడు చుట్టూ ఉన్న ఫ్రెండ్స్ సైతం చివరకు సాయం చేయరు. చివరకు అభి ఓ అపార్ట్మెమెంట్‌లోకి వెళ్తాడు. అలా ప్రియ,అభిలు అక్కడ లిఫ్ట్ ప్రమాదంలో ఇరుక్కోవడంతో మొదటి భాగం పూర్తవుతుంది. అప్పటి వరకు ఎలాంటి అంచనాలు లేని కథనం కాస్త ఆసక్తికరంగా మారుతుంది. ద్వితీయార్థం మొత్తం కూడా లిఫ్ట్‌లోనే ఉంటుంది. లిఫ్ట్‌లో చిక్కుకున్న అభి, ప్రియలు ఎలా బయటపడ్డారు. లాక్డౌన్ అవ్వడంతో సాయం కూడా సరిగ్గా అందదు. ప్రియకు గర్భస్రావం జరిగితే.. డాక్టర్ సలహా, సూచనలతో అభి డెలివరీ చేస్తాడు. ఆ సమయంలో ఓ తల్లి పడే బాధన, పురిటినొప్పులను కళ్లారా చూసిన అభి పూర్తిగా మారిపోతాడు. బిడ్డను కనడానికి తల్లి పడే నొప్పిని అలా ప్రత్యక్షంగా చూడటంతో అమ్మ మీద ప్రేమ పెరుగుతుంది. చివరకు మంచి మనిషిలా మారుతాడు అభి. నటీనటులు అలా అమ్మ అన్నా కూడా, మహిళలు అన్నా కూడా గౌరవం లేని అభి నుంచి.. మంచి మనిషిలా మారిన అభి వరకు ఎన్నో రకాల ఎమోషన్స్‌ను విరాజ్ అశ్విన్ పలికించారు. ఇక ప్రియ పాత్రలో సినిమా మొదటి నుంచి కూడా గర్భవతిగానే అనసూయ కనిపిస్తుంటారు. చేసింది డీ గ్లామర్ రోల్ అయినా కూడా నటనకు స్కోప్ ఉన్న పాత్ర ఇది. క్లైమాక్స్‌లో అనసూయ నటన కంటతడి పెట్టిస్తుంది. బిడ్డను కనేందుకు తల్లి పడే బాధను కళ్లకు కట్టినట్టు చూపించేశారు. ఈ ఇద్దరూ కాకుండా అర్చన, అవినాష్, వైవా హర్ష, కాదంబరి కిరణ్, అన్నపూర్ణమ్మ ఇలా అందరూ కూడా తమ పాత్రలకు తగ్గట్టుగా నటించేశారు. ఈ కథలో చెప్పాలకున్నా పాయింట్ బాగానే ఉన్నా కూడా.. చెప్పిన విధానం మాత్రం నిరాశపరిచేలా ఉంది. కథ, కథనంలో ఇంకాస్త లోతు ఉంటే బాగుండేదనిపిస్తోంది. ద్వితీయార్థంలోని క్లైమాక్స్ సీన్లు, డాక్టర్ సూచనలతో ఏమీ తెలియని వ్యక్తి డెలివరి చేసే సీన్లు బాగానే ఉన్నాయి. రమేష్ రాపర్తి దర్వకత్వం బాగానే ఉంది. కానీ కథను మరింత బిగితో, పట్టుతో చెబితే బాగుండేది. సురేష్ రగుతు అందించిన సినిమాటోగ్రఫీ అందరినీ ఆకట్టుకుంటుంది. లిఫ్ట్‌లోని సీన్స్, క్లైమాక్స్ వర్కవుట్ అయ్యేలా ఉంది. సంగీతం, నేపథ్య సంగీతం ఎమోషన్స్‌ను ఎలివేట్ చేసేలా ఉన్నాయి. చివరగా.. సినిమా చూశాక దర్శకుడికి ‘థ్యాంక్ యు బ్రదర్’ అని చెప్పుకునేంతగా గొప్పగా లేదు. అయితే అనసూయ అభిమానులు దర్శకుడిని ‘థ్యాంక్ యు బ్రదర్’ అంటారేమో. అనసూయ తనను తాను నిరూపించుకునందుకు మరో పాత్ర లభించింది. కానీ పూర్తి సినిమా మాత్రం అంతగా ఆకట్టుకోలేకపోవచ్చు.

from Telugu Movie News | Movie News in Telugu | Movie Gossips in Telugu https://ift.tt/3nT0Qiw