బస్ కండక్టర్‌ నుంచి సూపర్‌స్టార్‌గా... 70వ పడిలోకి సూపర్‌స్టార్ రజినీకాంత్

సినిమా హీరో అంటే ఆరడుగుల ఎత్తుండాలి, కండలు తిరిగిన బాడీతో ఉండాలి. తెల్లగా అందంగా ఉండాలి... అని అందరూ అనుకుంటారు. కానీ ఆ లక్షణాలేవీ ఆయనకు ఉండవు. మనిషి చూడటానికి నల్లగా ఉంటారు. మరీ అంత ఎత్తు కూడా కాదు. బక్కపలచని శరీరం. నిజం చెప్పాలంటే హీరోకి ఉండాల్సిన భౌతిక లక్షణాల్లో ఆయనకుండేవి చాలా తక్కువే. కానీ నడుచుకుంటూ వస్తే చాలు బాక్సాఫీస్ దద్దరిల్లిపోతుంది. ఆయన బొమ్మ పడితే థియేటర్లు విజిల్స్, కేకలతో మార్మోగిపోతాయి. ఇక రికార్డుల సంగతి చెప్పనక్కర్లేదు. ఆయనెవరో కాదు.. ది వన్ అండ్ ఓన్లీ సూపర్ స్టార్ . పేరుకి తమిళ హీరోనే అయినా ఆయనకు సౌతిండియా నార్త్ ఇండియా అన్న బేధం లేకుండా దేశమంతా ఫ్యాన్స్ ఉన్నారు. ఇంకా చెప్పాలంటే జపాన్, హాంగ్ కాంగ్ వంటి దేశాల్లో కూడా ఆయనకు బోలెడంత మంది అభిమానులున్నారు. నేడు(డిసెంబర్ 12) ఆయన 70వ పుట్టినరోజు జరుపుకుంటున్నారు. ఈ సందర్భంగా సూపర్‌స్టార్ గురించి సమయం అందిస్తున్న ప్రత్యేక కథనం.. కండక్టర్ నుంచి సూపర్ స్టార్.. రజినీకాంత్ అసలు పేరు శివాజీ రావ్ గైక్వాడ్. బెంగళూరులో స్థిరపడిన ఒక మరాఠా కుటుంబంలో 1950 డిసెంబర్ 12న జన్మించారు. రామకృష్ణ మఠంలో విద్యను అభ్యసించే రోజుల్లోనే రజినీకాంత్ పౌరాణిక నాటకాల్లో నటించేవారు. అప్పట్లో రజినీ నటనకు మంచి ప్రశంసలు అందేవి. స్కూల్‌ ఎడ్యుకేషన్ పూర్తికాగానే రజినీ ఉద్యోగ వేటలో పడ్డారు. బెంగుళూర్ ట్రాన్స్‌పోర్ట్ సర్వీస్‌లో బస్ కండక్టర్‌గా చేరారు. అప్పట్లో కొత్తగా ఏర్పాటైన మద్రాస్ ఫిల్మ్ ఇన్‌స్టిట్యూట్ అడ్మిషన్స్ కోసం ఓ ప్రకటన ఇచ్చింది. ఇది చూసిన రజినీ స్నేహితుడు రాజ్ బహదూర్ ఆయన్ని ప్రోత్సహించారు. దీంతో ఆయన 1973లో మద్రాస్ ఫిల్మ్ ఇన్‌స్టిట్యూట్‌లో చేరారు. తొలి అవకాశమిచ్చిన బాలచందర్ ఓ రోజు ఒక నాటక ప్రదర్శనలో రజినీకాంత్‌‌‌ను చూసిన దిగ్గజ దర్శకుడు కె.బాలచందర్ త్వరగా తమిళం నేర్చుకుంటే మంచి అవకాశం ఇస్తానని చెప్పారు. దీంతో రజినీ కొద్దిరోజుల్లోనే తమిళం నేర్చుకున్నారు. అలా 1975లో రజినీకి బాలచందర్‌ తొలి అవకాశం ఇచ్చారు. ఆ సినిమానే ‘అపూర్వ రాగంగళ్’ అయ్యింది. అక్కడి నుంచి చిన్న చిన్న పాత్రలు చేసుకుంటూ సోలో హీరోగా ఎదిగారు రజినీ. ఒక్క ఏడాదిలో 20కి పైగా సినిమాల్లో నటించి మెప్పించారు. వచ్చిన ప్రతీ అవకాశాన్ని సద్వినియోగం చేసుకుంటూ రజనీ హీరోగా ఎదుగుతూ వచ్చారు. విలన్‌ పాత్రలో మెరిసి.. తమిళంలో ‘16 వయతినిలె’ (తెలుగులో ‘16 ఏళ్ల వయసు’) చిత్రంలో కమల్ హాసన్, రజినీకాంత్ కలిసి నటించారు. ఇందులో రజినీ విలన్ పాత్ర పోషించారు. ఆ తరవాత సోలో హీరోగా మారిన ఆయన ‘భైరవి’ సినిమాతో సూపర్ హిట్ అందుకున్నారు. అక్కడి నుంచి రజినీ పేరుకు ముందు సూపర్ స్టార్ బిరుదు చేరింది. తమిళంలోనే కాకుండా తెలుగు, కన్నడ, హిందీ భాషల్లోనూ రజినీ నటించారు. ‘టైగర్’ చిత్రంలో ఎన్టీఆర్‌కు తమ్ముడిగా నటించి ఆకట్టుకున్నారు. మోహన్‌బాబు ద్విపాత్రాభినయంలో వచ్చిన ‘పెదరాయుడు’ సినిమాలో రజినీకాంత్ పోషించిన పాపారాయుడు రోల్ తెలుగు ప్రేక్షకుల మదిలో చిరస్థాయిగా నిలిచిపోయింది. డబ్బింగ్ సినిమాలతో తెలుగులో క్రేజ్ అయితే రజినీకాంత్ నేరుగా చేసిన సినిమాల కంటే తమిళ డబ్బింగ్ సినిమాలతోనే తెలుగు ప్రేక్షకులకు దగ్గర కావడం విశేషం. ‘దళపతి, బాషా, ముత్తు, అరుణాచలం, నరసింహ, చంద్రముఖి, శివాజీ, రోబో’ 2.0 లాంటి చిత్రాలు తెలుగు ప్రేక్షకులను విశేషంగా ఆకట్టుకున్నాయి. రజినీ‌కాంత్ తన 45ఏళ్ల కెరీర్లో 166 చిత్రాల్లో నటించారు. డిసెంబర్ 31న రాజకీయ పార్టీ పెడుతున్నట్లు ఇటీవలే ప్రకటించిన ఆయన ఆ పనుల్లో తలమునకలై ఉన్నారు. వెండితెర ద్వారా కోట్లాది మందిని అలరించిన రజినీకాంత్.. రాజకీయాల్లో ఏ మేరకు రాణిస్తారో చూడాలి మరి. హ్యాపీ బర్త్‌ డే సూపర్‌ స్టార్

from Telugu Movie News | Movie News in Telugu | Movie Gossips in Telugu https://ift.tt/2W8nmHa