అత్యాచారం కేసులో... ప్రముఖ నిర్మాతకు 23ఏళ్ల జైలు శిక్ష

అత్యాచారం కేసులో కోర్టు కీలక తీర్పు ఇచ్చింది. ప్రముఖ హాలీవుడ్ నిర్మాత హార్వే వీన్ స్టీన్‌కు న్యాయస్థానం... జైలు శిక్ష విధించింది. మీటూ వేదికగా వేధింపులకు పాల్పడిన పలువురు టాప్ సెలబ్రిటీల పేర్లు ఇటీవల వెలుగులో వచ్చిన విషయం తెలిసిందే. అందులో ప్రముఖ హాలీవుడ్ నిర్మాత 67 ఏళ్ల హార్వే వీన్ స్టీన్ పేరు ప్రముఖంగా వార్తల్లో నిలిచింది. వీన్ స్టీన్ దాదాపు 80 మంది నటీమణులపై వేధింపులకు పాల్పడ్డారనేది ఆయనపై ఉన్న అభియోగం. ఆయన వేధింపులకు కొందరు హీరోలు కూడా బలయ్యారన్న ఆరోపణలు కూడా ఉన్నాయి. కేసు విచారణలో కొన్ని నేరాలు రుజువయ్యాయి. ఒకరిద్దరి విషయంలో కోర్టు తీర్పు వీన్ స్టీన్ కి అనుకూలంగా వచ్చినా మెజారిటీ నేరాలు రుజువయ్యాయి. దీంతో అతడికి 23 ఏళ్ల జైలు శిక్ష విధించింది మాన్‌హట్టన్ క్రిమినిల్ కోర్టు. అయితే కోర్టు శిక్ష విధించిన తర్వాత ఆయనను రైకర్స్ ఐలాండ్ జైలుకు తరలించారు. ఆ సమయంలో అతడికి గుండె నొప్పి రావడంతో.. వీన్ స్టీన్‌ను చికిత్స నిమిత్తం మాన్‌హాట్టన్ ఆస్పత్రికి బుధవారం సాయంత్రమే తరలించారు. రాత్రికి ఆయన ఆస్పత్రిలోనే ఉంటారని సన్నిహితులు ఒకరు మీడియాకు తెలిపారు. 'మీ టూ' ఉద్యమం విస్తృతమవడానికి నాంది పలికిన ఈ కేసులో ఆయనకు శిక్షాకాలాన్ని తగ్గించాలంటూ వీన్‌స్టీన్‌ తరఫు న్యాయవాది చేసిన అభ్యర్థనను మన్‌హాట్టన్‌ క్రిమినల్ కోర్టు గతంలో తోసిపుచ్చింది. ప్రొడక్షన్‌ సహాయకురాలిగా పనిచేసిన ఒక మహిళ, నటికావాలన్న కలతో హాలీవుడ్‌లో అవకాశాలు వెతుక్కుంటున్న మరో మహిళపై అత్యాచారానికి పాల్పడిన కేసులో వీన్‌స్టీన్‌కు ఈ శిక్ష పడింది. గత రెండేళ్లుగా హార్వే వీన్ స్టీన్ పేరు మీడియాలో, వార్తల్లో నిత్యం వినిపిస్తూనే ఉంది. 2006లో మీమీ హలేయిని.. 2013లో జెస్సికా మన్ .. వీన్ స్టీన్ ఘాతుకానికి బలయ్యారని కోర్టుకు గతంలో నివేదిక అందింది. 12 మందితో కూడుకున్న న్యూయార్క్ జ్యూరీ ఫిబ్రవరిలో తీర్పు ఇచ్చింది. వేధింపులు నిజమేనని నిగ్గు తేల్చి వెంటనే జైలుకు పంపాలని గతనెలలోనే జ్యూరీ సభ్యులు ఆదేశించారు. ఇతర నేరాలు కూడా రుజువు కావడంతో... వీన్ స్టీన్‌కు మార్చి 11న.. 23 ఏళ్ల జైలు శిక్ష విధిస్తూ కోర్టు తీర్పు వెలువరించింది. వీన్ స్టీన్‌కు హాలీవుడ్‌లో మంచి పేరు ప్రఖ్యాతలు ఉన్నాయి. ఆయనకు అనేక అవార్డులు కూడా దక్కాయి. ది ఇంగ్లీష్ పేషెంట్, షేక్‌స్పియర్ ఇన్ లవ్ అనే పాపులర్ సినిమాలకు ఆయన నిర్మాతగా వ్యవహరించారు. ఆయన సినిమాలకు ఆస్కార్ అవార్డులు కూడా లభించాయి.

from Telugu Movie News | Movie News in Telugu | Movie Gossips in Telugu https://ift.tt/2IHrAiu